Felicem Christi diem natalem!

Psalmistae Chori Breviarii et Fratres Parvi Oratorii vobis ex imo corde optant felicem Christi diem natalem!

Missa pro candidato ad sacerdotium

Feria sexta praeteritae hebdomadis, a.d. XIII Kal. Dec., apud campum Universitatis Joannis Pauli Magni, congregati sumus ut caneremus in Missa pro Stephano Marshall, ad sacerdotium candidato. Stephanus enim amicus noster est et pelliculam cinematographicam composuit illustrantem opus Chori Breviarii Fratrumque Parvi Oratorii, quod plurimi homines videant.

Nunc in Congregatione Jesu et Mariae ingressus est ubi, Deo volente, fiet sanctus sacerdos.

Missa quidem Anglice secundum Missale Romanum Pauli VI oblata est, nobis autem aliquos cantus Gregorianos canentibus, videlicet Kyrie, Sanctus, Agnus Dei. Post celebrationem, Stephanus omnibus gratias egit et, una cum matre, in photogrammate nobiscum pictus est.

Ad multos annos, Stephane!

Missa pro defuncto sacerdote

Reverendus pater L. Dudley Day, O.S.A., qui obiit a.d. V Non. Oct., A.D. MMX, amicus nostri patris Henrici Neely fuit. Utri enim in eadem schola didicerunt. Desiderante patre Henrico sacrum in amici sui memoriam celebrare, a.d. IX Kal. Nov. reversi sumus ad sacellum monasterii s. Augustini ubi missae pro defunctis cantus gregorianos cecinimus. Cum Joannes abesset, Richardo nos bene dirigente, patris Dudley Day animam Deo misericordiarum commendavimus.

Missa in honorem beati Joannis Henrici Newman

Dies nonus Octobris a domino nostro Papa Benedicto XVI festus in honorem beati Joannis Henrici Newman factus est. Quod magni momenti est omnibus oratorianis, cum beatus Joannis Henricus s. Philippi Nerii religionem in Anglia instituerit. Propterea sabbato a.d. VII Id. Oct., fratres Oratorii et psalmistae Chorus Breviarii reversi sunt ad ecclesiolam s. Augustini ut canerent et reverendo patri Henrico Neely, O.S.A. ministrarent in Sacro ad Anglici theologi honorem celebrato. Missa autem quae "Os justi" dicitur erga formam Missalis Romani extraordinariam oblata est, cantu quidem gregoriano adornata. Cum solemnia omnino Latine celebrata sint, duo tamen hymni Anglici a beato Joanne Henrico compositi canti sunt, qui nuncupantur "Humane duc, o Lux" atque "Laus Sanctissimo in excelsis". Beate Joannes Henrice, ora pro nobis ut digni efficiamur promissionibus Christi.

In festo sancti Augustini

Photogramma a Jonatha captum

Die vigesimo octavo Augusti (a.d. IV Kal. Sep.), magno cum gaudio, dies festus s. Augustini episcopi et confessoris a fratribus celebratus est.

Nam apud ecclesiolam monasterii s. Augustini, p. Henricus Neely missarum solemnia in honorem sancti patroni sui obtuli, fatribus et Chori Breviarii psalmistis in choro canentibus. Eremitae ordinis s. Augustini, ante mutationes deprecabiles quae post concilium vaticanum secundum factae sunt, suis cantibus utebantur ad proprios sanctos honorandos. Non solum in missa s. Augustini ab augustiniano sacerdote celebrata, orationes, lectiones, alleluia, et praefatium ab usu Romano differunt, sed et pulchra sequentia "De profundis tenebrarum" canitur, quae aliunde omnino abest. Putamus prima vice ab anno MCMLXIX missam erga usum augustinianum Didacopoli celebratam esse.

Post sacrum, una cum patre Henrico, cecinimus alteram sequentiam joculatoriam adversum Lutherum, sicut invenitur in capite XXXV historiae Ordinis s. Augustini a Nicolao Crusenio conscriptae.

Deo gratias!

Hic audire potestis nonnullos cantus:

Pluria et pulchra photogrammata a fratre Ronaldo capta:

Pulsate ligamen ut largiora photographemata videatis

Vesperae in Assumptione B.M.V.

Assumpta est Maria in coelum!

Post plurimos menses, cum jam illic adfuissemus in vigilia Sanctorum Omnium, heri reversi sumus Sanctum Joannem Capistranum ad preces vespertinas effundendas in honorem beatae virginis Mariae in coelum assumptae. Nam, ex photographemate bene intuemini quam multi viri adfuerunt in parvo presbyterio! Et amicos, qui longius abfuerant, iterum vidimus et novos homines convenimus. Reverendus autem pater Victor Szczurek, O. Praem., benignissimus hominum, hebdomarius factus est. Gratias plurimas habemus amico Davidi, praesidi "Una Voce" societatis, qui omnia praeparavit. Utinam in basilica proxima vice canamus!

Photogrammata a Ronaldo capta:

Pulsa hic ut intuearis largiora photographemata

De precibus vespertinis cum domino Christophoro Basden

Reverendus dominus Christophorus Basden, parochus ecclesiae sancti Bedae, Londinii, his diebus in Civitatibus Foederatis moratur. Quem, cum in Anglia habitaret, Joannes noster cognovit. Propterea a Joanne dom. Christophorus invitatus est ut Didacopolin visitaret et preces vespertinas nobiscum celebraret. Ideo, die dominica undecima Julii (more antiquorum Romanorum, a.d. VI d. Jul.), congregati sumus apud sacellum s. Augustini ad preces vespertinas canendas.

In photographemate supra posito, dom. Chistophorus indutus est nostra nova cappa aurea quae in India facta est. Post celebrationem profecti domum Joannis, exercitiis Oratorii ibi peractis, recreati sumus. De dom. Christophori urbanitate et humanite valde delectati, ei exoptamus tutum iter et reditum in patriam. Utinam conveniamus iterum cum eo!

Pulsate ut majora photographemata videatis

Pulchra et plurima photographemata a Ronaldo capta sunt.

De solemni fratris Ronaldi professione

Die sabbati duodecimo Junii, iterum reversi sumus ad monasterium s. Augustini, cum amicus noster frater Ronaldus Custorius, O.S.A. votum perpetuae oboedientiae, paupertatis et castitatis pronuntiaret.

Membra Chori Breviarii et fratres Parvi Oratorii invitati sunt ut aliquas Missae partes canerent.

Professione celebrata, ante ecclesiolae ostia convenimus ubi imago nostra cum fratre Ronaldo et patre Henricus pincta est:

Gratias Deo agamus quoniam alius s. Augustini filius mundo renuntiavit ut aeternae vitae potiretur!

Festum s. Philippi Nerii

Hoc anno festum s. Philippi Neri Didacopoli celebratum est die quarto et quinto Junii, permissione a vicario episcopali habita. Feria VI, apud ecclesiam cathedralem s. Josepho dicatam, fratres Parvi Oratorii et Chori Breviarii psalmistae vesperas solemnes celebraverunt, hebdomadario rev. patre Justino Ramos, O. Praem., adsistentibus rev. p. Victore Szczurek O. Pream. et domino Jacobo Crittenden. Fratres et psamistae a Magistro caerimoniarum Ashleio directi sunt, qui Cincinnatis evolavit ut adesset. Joannes praecentor elegit pulcherrima musicae opera pro patrono nostro canenda, inter quae saltem memorandae sunt Vesperae solennes de confessore a Wolfgango Amadeo Mozart.

Die Sabbati, ad s. Josephi aedem reversi, fratres ministraverunt rev. patri Victori Szczurek, O. Praem., qui sacrum solenne obtulit, adjuvantibus eum rev. p. Justino Ramos, O. Praem. et domino Jacobo Crittenden. Pulchra Missa tribus vocibus a Guillelmo Byrd audita est.

Post Romane liturgiae mutationes quae annis praeteritis factae sunt, sacrificium Missae erga ritum Gregorianum iterum oblatum est in prima Didacopoleos ecclesia. Chorus Breviarii et Fratres Parvi Oratorii grati sunt vicario episcopali, patribus praemonstratensibus, parocho ecclesiae cathedralis sacristaeque, musicis, amicis, et benefactoribus.

Processio de Rosario apud campum Universitatis Sancti Didaci

Die dominico II Maii, sive a.d. VI Nonas Maias more antiquo, hora XIV et dimidia, quinque fratres Parvi Oratorii necnon Chori Breviarii sodales convenerunt apud Universitatis Sancti Didaci campum ut processionem in honorem Mariae sanctissimae participarent. Per XXIV annos homines semel in mense illic congregati sunt ut per beatae Mariae virginis intercessionem ad veram fidem Universitas illa et aliae scholae nomine Catholicae tantum reverterent. Sed nunc abhinc processiones circa sanctae Annae ecclesiam fient, quod lamentabile nobis videtur, cum conversione paroecia illa certe non indigeat. Quindecim mariani Rosarii decades recitatae sunt cum hymnis in fine uniuscujusque. Fratres induti erant habitus confraternitatis Pretiosissimi Sanguinis, sicut eis oportet cum ad processiones adsint.

Preces Vespertinae, Dominica II post Pascham

Die dominica XVIII Aprilis, Fratres Parvi Oratorii ac sodales Chori Breviarii iterum ad sancti Augustini monasterium reversi sunt ad verspertinas orationes canendas. Post tempus poenitantiae et passionis in quo nobis eum canere non licebat, cantus Alleluia pluries auditus est, qui animos ad paschale gaudium excitaret. Hebdomadarius fuit noster carissimus rev. p. Henricus Neely, O.S.A., qui semper nos benigne accipit. In photographia post eventum capta, frater Joannes apud organum adsistit et duo hospites sedent.

Tenebrae A.D. MMX

Decem abhinc annos Chorus Breviarii et Fratres Parvi Oratorii officium Matutini et Laudum in Feria V Sanctae Hebdomadae, quod Tenebrae dicitur, canunt. Hoc quoque anno, pridie Kal. Apr., hora decima nona, ad sancti Joannis Evangelistae ecclesiam reversi sunt ubi jam prioribus annis cecinerant, cum quibus et Renascentiae Gemmenses Cantores pulchram polyphonicam musicam perhibentes adfuerunt. Hebdomadarius iterum nobis dilectissimus rev. p. Henricus Neely, O.S.A. factus est, qui suavi voce sua pacem auribus cordibusque nostris semper infundit. Imagines quas videtis Jonathas V. machinula photographica cepit. Cum motoriae quoque imagines nobis sint, hic posui illas de psalmo L (Miserere), qui in officii fine cantus est, tenebris in ecclesia factis:

In die Paschae A.D. MMX

Surrexit Christus spes mea! Laetemur igitur quia victor est Christus super mortem vitam mortuis donans. Vobis omnibus felicem Pascham!

Invitatio ad Cenaculum Familiae Sancti Hieronymi

Invitati estis, amici, ad Cenaculum Familiae Sancti Hieronymi, quod Tampae, in urbe Floridae, fiet a die 2o usque ad diem 7um mensis Augusti anno Domini 2010. Ibi lingua Latina nobis erit sermo communis non solum in celebrationibus liturgicis, sed etiam in allocutionibus de re catholica et in jucundis lusionibus. In loco amoeno manebimus, apud Praetorium Franciscanum, cui pro sumptibus victus et domicilii debentur $295 vel $375, si soli in cubiculis esse vultis. Ad Cenaculum participandum, mittite schedam inscriptionis ad Familiae secretarium:

MR. J. G. HALISKY

Attorney-at-Law

507 S. Prospect Avenue

Clearwater, Florida 33756

U.S.A.

FAX : (727-442-4750)

INSCRIPTIO INTERRETIALIS (i.e., e-mail) : jogranhier (at) pngusa (dot) net

Si tamen questiones mihi miseritis, libenter vobis respondebo: bedwere (at) yahoo (dot) com

Missa Feriae VI post Dom. III et Vesperae Dominicae IV in Quadragesima

Fratres Parvi Oratorii Didacopoli et Chori Breviarii sodales bis in tribus diebus apud Monasterium s. Augustini adfuerunt. Feria enim VI (die Veneris), 12mo Martii, rev. patre Henrico Neely, O.S.A. missarum solemnia celebrante, fratre Davide ei ministrante, alii gregorianos proprios et ordinarios cantus cecinerunt. Feriae in tempore Quadragesimae longas lectiones habent ex Antiquo Testamento electas quae praefigurant Novi Testamenti eventus. In photographia hic imposita, pater Henricus canit lectionem ex libro Numerorum de aqua quam per Moysen Deus Pater Israelitis dedit in deserto. In Evangelio autem audivimus de vitae aeternae aqua quam Dominus Jesus, Dei Filius, daturus est fidelibus suis. Si cantus proprii audire vultis, pulsate ligamen.

Die dominica reversi sunt fratres necnon sodales ut preces vespertinas per cantum effunderent. Ab urbe Franciscopoli evolavit Jacobus, quem jucundissime rividimus. Pater Henricus, cum novum pluviale (quod dicitur etiam cappa) induisset, pro celebratione hebdomadarius factus est. Photographia hic imposita nos ostendit post eventum. Sed Joannes et imagines mobiles impressit, a vobis utique videndas:

Preces Vespertinae, Die Dominico 28vo Februarii

Post aliquot menses ex ultima vice, fratres Parvi Oratorii et psalmistae Chori Breviarii iterum preces vespertinas cecinerunt apud monasterium s. Augustini, Didacopoli. Hebdomadarius fuit rev. P. Henricus Neely, O.S.A. Inter psalmistas libenter accepimus Jacobum C., qui, Franciscopoli habitans et Sancti Andreae in Scotia studens, huc volavit ut nobiscum Vesperas celebraret. Antiphona ex Evangelio diei de transfiguratione Domini spiritus nostros ad contemplandam Veritatem elevavit necnon eos roboravit ad quadragesimale jejunium prosequendum. Precibus vespertinis expletis, Exercitia Oratorii recititata sunt. Deinde apud Joannis casam convenimus ubi parvum convivium habitum est.

Missa in Festo Ss. Septem Fundat. Ord. Servorum B. M. V.

Die 12mo Februarii (sive prid. Id. Feb.), Fratres Parvi Oratorii Didacopoli et psalmistae Chori Breviarii Missae celebrationem curaverunt in die festo sanctorum septem fundatorum ordinis servorum Beatae Mariae Virginis. Rev. Pater Henricus Neely obtulit sacrosanctum Sacrificium, ministrante ei fatre Davide. Cantus gregoriani ex Missali Romano a ceteribus fratribus canti sunt, quos audire poteritis si pulsaveritis ligamen hoc.

Sacris celebratis, morati sumus aliquantulum in monasterii sacristia, ubi photographiae hae captae sunt.

Gratias habeamus Patri Henrico pro humanitate ejus et benefactoribus nostris.

Missa in Festo Sanctae Agnetis Romanae

Didacopoli, apud s. Augustini monasterium, die vigesimo primo Januarii, more antiquo a.d. XII Kal. Feb., Missarum solemnia celebrata sunt in honorem s. Agnetis Romanae, virginis et martyris, necnon castitatis patronae. Sicut solent, fratres Parvi Oratorii et Chori Breviarii psalmistae convenerunt, cecinerunt, et pro reverendo patre Henrico Neely, O.S.A., sacrosanctum sacrificium celebrante ministraverunt. In photographia, ministri Jacobus (ad dexteram) et David adjuvant p. Henricum dum pretiosissimi Sanguinis calix elevetur.

Antea nota parabola de fatuis et prudentibus virginibus audita est. P. Henrici sermo a me Latine versus nunc sequitur:

Sponsae amicae in parabola hac, in textu Latino qui nuperrime audistis, virgines appellantur. Patres autem commentaverunt de hac evangelii sequentia significantes earum virginitatem, qua omnes fruerentur, aditum ad nuptias non spopondisse. Integritas earum, videlicet nostra in Ecclesia proprietas, satis per se non est. Sed oleum quod fatuis deest divinum amorem sive caritatem significat. Gratia enim gratum faciens, quae caritatis in nobis causa est, clavis est ut ad nuptias intremus. Media autem nocte, sponsi adventum omnino non expectantes, parati esse debemus. Cotidie nobis providendum est ut parati simus, ut aperti simus, ut in gratuito unionis cum Deo statu simus, qui est Dei donum pro nobis, videlicet gratia gratum faciens, sive coelestis vita hic in terra anticipata.

Utinam nos omnes simus semper parati sicut Agnes puella fuit!

Ligamen pulsate ut proprium Missae in cantu Gregoriano audiatis.