In Immaculata Conceptione Beatae Mariae Virginis

Sabbato ante diem sextum nonas Decembres, dies festus Immaculatae Conceptionis magnae Matris Dei, Mariae sanctissimae, digne celebratus est in ecclesia s. Joannis a Cruce in Lemoneto (vulgo Lemon Grove). Ibidem congregati sunt fratres Parvi Oratorii, inter quos erat frater Jonathas nuperrime Londinio reversus, ut ministrarent atque canerent in sacrosancto Missae sacrificio quod rev. p. Harrius Neely, O.S.A. obtulit. Cum omnia ad majorem Dei glariam semper fiant, concursus autem fidelium  haud modicus replevit nos gaudio.

 Imagines a domina Nuntia P. captae.

Quod fecimus per praeteritam septimanam

Chorus Breviarii et Fratres Parvi Oratorii multa fecerunt per praeteritam septimanam. Die enim dominica 28a Octobris, ab urbe  Cincinnatopoli frater Esselega, rei liturgicae peritus, Didacopolin pervenit ut nos doceret ac adjuvaret. Incepimus igitur feria secunda, in ecclesia s. Joannis a Cruce dicata, ubi Missa pro defunctis a rev. domino Burto Boudoin oblata est in suffragium animae mulieris cujsdam, Jocosa nomine, quae mense Augusto repente obiit. Jocosa autem Chori Breviarii amica  facta erat, cum frequentaret nostras prolusiones quae in ecclesia praedicta habentur necnon caerimonias tum eodem tum aliubi. Deinde, pridie Kalendas Novembres, preces vespertinas in honorem sanctorum omnium celebravimus in ecclesia Dominae Nostrae Rosarii, in Parva Italia. Doleo autem quia desunt photogrammata de istis eventibus. Habemus tamen pelliculam de Missa quae, die secundo Novembris, in ecclesia s. Caroli Borromaei ab eodem dom. Burto celebrata est,  in commemorationem omnium fidelium defunctorum:

Postremo, heri processio eucharistica facta est a Domina Nostra Rosarii usque ad ecclesiam cathedralem sancti Josephi. Photogramma autem ostendint nonnullos fratres cum militibus Columbi ante januam ecclesiae:

Hodie denique Esselega quidem Cincinnatopolin reversus est, Joannes autem  Londinium profectus est. Ambobus ergo iter tutum optamus,

Dominica XIV Post Pentecosten

Die Dominica XIV Post Pentecosten, a.d. IV Non. Sep., quattuor fratres Parvi Oratorii ad ecclesiam Beatae Mariae Virgini dicatam, Obsconditi, pervenerunt ut rev. p. Harrius Neely, O.S.A. Missam cantatam offerret. Deest enim chorus apud ecclesiam illam, parvo Christifidelium coetu. Deinde tres nostrum cecinerunt, unus ministravit cum alio ministro. Ordinarium VI electum est una cum Symbolo Nicaeno I. 

Imagines mobiles inspicite, si placeat vobis:

 

De Missa in trigesimo sacerdotalis ordinationis anniversario

In ecclesia sancti Caroli Borromaei, ante diem VII Idus Julias, reverendus dominus Burtus Boudoin anniversarium trigesimum ordinationis suae celebravit. Sacrosanctum autem Missae sacrificium ab illo oblatum est ritu sanctae Romanae Ecclesiae antiquiore, qui vocatur etiam forma extraordinaria. Fratres quippe Parvi Oratorii atque sodales Chori Breviarii non abfuerunt a tali conventu, qualis rariter in dioecesi nostra paratur. Ministaverunt enim alii ad altare, alii cecinerunt cantus gregorianos Missae proprios. Ordinarium autem Missae, quod Joannes Petrus Aloysius de Praenestina olim composuit, ab amicis cantoribus cantum est. In sanctuario adstiterunt et parochus rev. dom. Jacobus Bahash et adjutor ejus rev. dom. Arnoldus Tadena. Quattuor postremo ex paroecia adolescentes ceriferi facti sunt a thurifero Lino conducti. 

Imagines laeti eventus a fratre Ronaldo capta vos delectent:

De itinere septem ecclesiarum

Inter alia memoranda, sanctus pater noster Philippus Nerius septem ecclesiarum iter restituit per ecclesias stationales Romanas. Nos autem iter per septem ecclesias Didacopolitanas fecimus ut fidem Catholicam publice testificaremur in diebus nostris, pluribus adversus Ecclesiam insurgentibus. Die autem sabbati, pridie kalendas Julias, missarum solemnia in monasterio s. Augustini canta sunt a rev. p. Harrio Neely, O.S.A. in honorem Pretiosissimi Sanguinis Domini Nostri Jesu Christi.

Post missam ad s. Augustinum

Deinde, kalendis Juliis, die dominica, iter factum est ab ecclesia s. Patricii usque ad cathedralem s. Josephi, per s. Didacum, s. Joannem evangelistam, s. Vincentium a Paulo, Immaculatam Conceptionem, Dominam Nostram Rosarii. A Domina autem Nostra Rosarii usque ad s. Josephum procedimus cum sanctissimo Sacramento, magno populi concursu.

.

Incipit processio eucharistica

Gratias agamus Deo et Patri domini nostri Jesu Christi, qui nos servavit per iter et preces nostras a Sancto Spiritu inspiratas benigne suscepit.

Preces vespertinae et Missa in honorem s. Philippi Nerii

A.d. VII Kal. Jun., dies festus s. Philippi, patroni nostri, recolitur. Hoc autem anno, cum et vigilia Pentecostes esset, non licuit Missarum solemnia celebrari erga formam ritus Romani extraordinariam. Propterea tantummodo preces vespertinae, quarum imagines sequuntur, cantae sunt usu antiquiore in monasterio s. Augustini, rev. p. Harrio Neely, O.S.A. hebdomadario.

Deinde, mane Sabbati, sacrum erga missale Romanum Pauli VI oblatum est ab eodem p. Harrio Neely, lingua Latina, ad orientem, cum cantu Gregoriano. Post autem meridiem, iterum congregati sumus ad canendum in oppido Sancti Marci, in ecclesia eidem sancto dicata, ubi filiola Jonathae primam sanctam communionem suscepit. 

Factum per Admarket's flickrSLiDR.

Novus autem homo inter nos libentissime acceptus est, nomine Michael, qui affectum omnium summa obtinuit benignitate. Gratias tibi, s. Philippe! 

Dominica IV post Pascha, ad vesperas

Die dominica IV post Pascha, pridie Nonas Maji, apud ecclesiam sancto Carolo Borromeo dicatam preces vespertinae cantae sunt. Hebdomadarius autem fuit reverendus dominus Burtus Boudoin, fratribus Parvi Oratorii ac psalmistis Chori Breviarii ministrantibus. Hora autem vespertina optime consonat lectioni evangelicae. Tempore enim Ascensionis appropinquante, corda discipulorum tristitia implentur. Sed Dominus novum gaudium nobis nuntiat, cum Spiritus Sanctus omnem maerorem fugaturus sit.  

Procedentes in sanctuarium

Dominus. Boudoin adiuvatur a caerimonario ac turifero

Tabernaculo vacuo, hebdomadarius versus crucem se flectit.

Psalmodiam canentes

Regina Caeli canitur ante imaginem Virginis Guadalupensis

Ituri ad hebdomadarium 

Revertentes in sacristiam

In festo s. Georgii

Dies festus s. Georgii, a.d. IX Kal. Mai., recultus est a psalmistis Chori Breviarii una cum fratribus Parvi Oratorii in ecclesia s. Joannis a Cruce in oppido Limoneto, vulgo Lemon Grove. Missarum autem solemnia a rev. p. Federico Masutti, F.S.S.P. celebrata sunt, haud parvo Christifidelium concursu. Cum perpauca nota sint de s. Georgio martyre sub Diocletiano imperatore, omnes tamen sciunt fabulam duelli cum dracone, quam Jacobus a Voragine in Legenda aurea conscripsit. Fabula autem monet adhaerendum nobis Dominum in adversitatibus, significans etiam victoriam rationis a fide illuminatae supra passiones corporales, quae animam captam tenebant. Gavisi postremo sumus quia thuriferario Georgius nomen est atque urbs natalis servi vestri, nemper Ferraria, sub patrocinio ejusdem sancti posita est.

De corona divinae Misericordiae

Imago a pictore Polono Eugenio Kazimirowski picta.

Legitur autem in calce "Jesu, confido in Te".

Jussu beati Joannis Pauli II, Dominica in Albis divinae Misericordiae  adscripta est. Quod autem  obtemperat  revelationem privatam sanctae Faustinae Kovalska, cui Dominus Jesus observantiam hanc praecepit. Corona igitur divinae Misericordiae in die Dominica prima post Pascha potissime recitatur. Cujus autem versionem Latinam lectoribus antepono paulo differentem ab illa in situ optimo, qui nuncupatur Thesaurus Precum Latinarum, posita. Mihi enim displicet versio illa in qua legitur:

miserere nobis et totius mundi

Licet autem uti casu dativo (nobis) cum verbo "misereor", piget quidem uti simul ac genitivo (totius mundi). Propterea in versione mea tantummodo casu genitivo utor, tum in invocatione ad singula grana in quibus Ave Maria dicitur, tum in conclusione. Quamcumque autem versionem optetis, oportet nos omnes divinam Misericordiam invocare.

Incipit coronae divinae Misericordiae:

Pater noster, qui es in caelis, sanctificetur nomen tuum. Adveniat regnum tuum. Fiat voluntas tua, sicut in caelo et in terra. Panem nostrum quotidianum da nobis hodie, et dimitte nobis debita nostra sicut et nos dimittimus debitoribus nostris. Et ne nos inducas in tentationem, sed libera nos a malo. Amen

Ave Maria, gratia plena, Dominus tecum. Benedicta tu in mulieribus, et benedictus fructus ventris tui, Jesus. Sancta Maria, Mater Dei, ora pro nobis peccatoribus, nunc, et in hora mortis nostrae. Amen

Credo in Deum Patrem omnipotentem, Creatorem caeli et terrae. Et in Jesum Christum, Filium eius unicum, Dominum nostrum, qui conceptus est de Spiritu Sancto, natus ex Maria Virgine, passus sub Pontio Pilato, crucifixus, mortuus, et sepultus, descendit ad inferos, tertia die resurrexit a mortuis, ascendit ad caelos, sedet ad dexteram Dei Patris omnipotentis, inde venturus est judicare vivos et mortuos. Credo in Spiritum Sanctum, sanctam Ecclesiam catholicam, sanctorum communionem, remissionem peccatorum, carnis resurrectionem et vitam aeternam. Amen.

Ad singula grana in quibus Pater Noster dicitur:

Pater aeterne, offero tibi Corpus et Sanguinem, animam et divinitatem dilectissimi Filii Tui, Domini nostri, Jesu Christi, in propitiatione pro peccatis nostris et totius mundi.

Ad singula grana in quibus Ave Maria dicitur:

Pro dolorosa Ejus passione, miserere nostri et totius mundi.

In conclusione, ter dicitur:

Sanctus Deus, Sanctus Fortis, Sanctus Immortalis, miserere nostri et totius mundi.

Haec dies quam fecit Dominus.

Omnibus, carissimis, lectoribus nostris felix Pascha Domini ex imo corde exoptamus.

Tenebrae MMXII

Die 4a Aprilis, pridie Nonas Aprilis, officium matutini et laudis feriae V in hebdomada sancta, quod Tenebrae nuncupatur, a fratribus et sodalibus Chori Breviarii cantum est. Convenimus enim in solito loco,  ubi jam peregimus officium annis praeteritis, nempe in ecclesia s. Joannis Evangelistae. Deinde, psalmi, responsoria, lectiones et cantica profusa sunt dum candelae singillatim extinguerentur.  Hebdomadario autem rev. dom. Eugenio Sta. Ana  gratias plurimas agimus, grati quidem sumus et rev. p. Reginaldo De Four, qui nos comitatus est in choro. Optamus tandem omnibus lectoribus felix Pascha resurrectionis Domini.

Responsoria canuntur tono nostro

Frater Ronaldus canit lectionem ex  Lamentationibus Jeremiae prophetae

Cantores canunt antiphonam parva voce

Andreas extinguit candelem in fine uniuscujusque psalmi

Coetus noster cum rev. dom.  Eugenio Sta. Ana et rev. p. Reginaldo De Four.

Secundae vesperae in festo Annuntiationis B.M.V.

Feria secunda, a.d. VII Kal. Apr., dies festa Annuntiationis Beatae Mariae Virginis celebrata est a sancta Romana Ecclesia. Dies enim Annuntiationis, quae  accidit a.d. VIII Kal. Apr., cum dies dominica Quadragesimae hoc anno fuisset,  posticipata est. Reverendus autem dominus Burtus Boudoin, adjutor parochi, nos invitavit ad ecclesiam divo Carolo Borromeo dicatam ac in Litore Imperiali sitam, ut secundas vesperas caneremus in honorem Virginis Deiparae. Propterea Fratres Parvi Oratorii, psalmistae Chori Breviarii, quibus adjuctus est Linus, sacrista s. Caroli, libenter cantus Gregorianos effuderunt coram circiter centum Christi fidelibus. Deo volente, iterum revertemur ad ecclesiam illam ubi benignissime recepti sumus. 

Jonathan et Ronaldus

Nos omnes cum dom. Burto Boudoin

Missa in sabbato post III dominicam Quadragesimae

Reverendus pater Harrius Neely, O.S.A.

Sacrosancta Romana Ecclesia ferias in Quadragesima  propriis cantibus celebrat, qui tamen rariter audiuntur extra monasteriorum claustra. Sed hodie, a. d. XVI Kal. Apr.,  fratres Parvi Oratorii et psalmistae Chori Breviarii opus dederunt ut Missa in cantu a rev. p. Harrio Neely, O.S.A. offerretur in ecclesia s. Joannis Evangelistae. Joannes enim duxit Thomam, Richardum, Jonathamque cantores, dum David, Georgius et Robertus p Harrio ministrarent. Pellicula autem totius ceremoniae hic inspici potest:  

 

Pellicula ex Justin.tv

De Cenaculo Familiae Sancti Hieronymi

Sancta Missa celebrata per praeteritum Cenaculum

Venite ad Cenaculum Familiae Sancti Hieronymi, quod fiet in pulchra urbe Orlando, in Florida, apud Dumum Sancti Petri. Huius quidem hebdomadae omnis dies plenus erit oratione liturgica et devotionali, allocutionibus thematum catholicorum et confabulatione inter participes. Etiam, haec omnia Latine peragentur! Quae lingua nos adunat in Ecclesia Catholica Romana transcenditque singulas culturas et linguas.

Sub patrocinio Familiae Sancti Hieronymi

22 -27 Julii, 2012

320 - 445 USD

Situs officialis Familiae Sancti Hieronymi cum invitatione Latina et Anglica et scheda inscriptionis

Die autem 29a Februarii secretarius Familiae hospes fuit societatis televisificae EWTN, emissione quae nominatur EWTN Live.

Missa in feria quarta cinerum

Feria quarta cinerum, quae a.d. VIII Kal. Mar. facta est, fratres Parvi Oratorii, psalmistae Chori Breviarii et mulieres cantrices convenerunt apud ecclesiam s. Annae, matri beatae virginis Mariae, dicatam. Ibi enim a reverendo dom. Carolo Gismondi, F.S.S.P, parocho illius paroeciae invitati erant ad canendos cantus in distributione cinerum et per Missam. Sacrificium autem rev. dom Joel Kiefer obtulit, qui bene cecinit et christifideles aedificavit. Deinde, post sacri finem, fratres acceperunt cineres super frontibus suis a tertio sacerdoti, rev. dom. Federico Masutti, F.S.S.P., ex patria Argentina nuper  Didacopolin reverso. Constat autem magnum concursum populi factum esse, cum fere dugenti homines adfuerint. 

Fratres et psalmistae cum sacerdotibus s. Annae et cantricibus.

Missa in purificatione beatae Mariae virginis.

Cantores

Dominus Burtus benedicit candelas.

Heri, a.d. IV Non. Feb., dies festus purificationis beatae Mariae virginis celebratus est in ecclesia s. Joanni a Cruce dicata, in oppido Limoneto (vulgo, Lemon Grove). Fratres enim Parvi Oratorii et sodales Chori Breviarii cecinerunt  ministraveruntque in missa a reverendo domino Burto Boudoin oblata. Duae autem cantrices nos comitatae sunt, omnibus vocibus simul laudes Deo canentibus. Magnus quidem fuit concursus fidelium, qui circiter centum numerati sunt, inter quos nonnullae Hispanicae mulieres gerentes simulacrum pueri Jesu, sicut eis mos est in die illa. Quod autem fit in imitatione Matris Dei primogenitum suum Filium in templo Hierosolymitano sistentis. .