Saturday, December 13, 2008

De Christi Die Natali


Sodalis sum fori interretialis cui nomen est SCHOLA. Cum in tempore Adventus simus, domina quaedam rogavit quaestionem de Christi die natali. Responsum meum sequitur:

Si quis plantam eradicaverit a solo, fortasse ea aliquando viridis manebit sed tandem exsiccetur. Mihi videtur amorem pacemque sonare nobis non posse quia ex eorum fonte homines non hauriunt. Majores nostri in Christi die natali celebrabant ipsum Regem pacis amorisque, verum Deum et verum hominem, qui ad regnum suum in cordibus nostris et in universo mundo condendum venisset. Dona dabant pueris quia credebant Deum puerum factum esse, omnipotentem in cuna constrictum, increatum ex Virgine natum. Expectabant diem natalem Ejus vigilantes et jejunantes quia expectatio eorum imago erat illius adventus in fine saeculi, qui Graece dicitur παρουσία. Sed cum in temporibus nostris dies Christi natalis sine Christo sit amorem et pacem homines in eo non invenient.
Opto vobis tribus lectoribus felicem diem Christi natalem cum Christo!

Wednesday, November 26, 2008

Vesperae Ultimae Dominicae post Pentecosten

Die 23 Novembris, fratres Parvi Oratorii Didacopoli preces vespertinas effunderunt in ecclesia s. Annae. Ultima dominica post Pentecosten erat secundum ritum Romanum classicum. Hebdomadarius fuit rev. dom. Carolus Gismondi, F.S.S.P., parochus paroeciae illae. In choro aderat etiam rev. pater Joannes Lyons, O.M.V.
Sex fratres Parvi Oratorii in presbyterio psalmos cecinerunt, ducti a magistro caerimoniae Esselega Paver, cum septimus frater, magister musicae Joannes Polhamus, organum caneret. Gratias agimus dominulae Rachel Gray quae nobis photographias humanissime misit.

Monday, November 24, 2008

Missa Pontificalis pro Defuncto Sacerdote

Feria sexta, die 21 in mense Novembris, Absconditi ("Escondido" Anglice immo vero Hispanice) in California, in ecclesia sanctae Mariae, reverendissimus dominus Episcopus auxiliarius dioeceseos Sancti Didaci Salvator Cordileone missarum solemnia celebravit pro nuper defuncto sacerdote amico suo cui nomen erat dominus Antonius Thomas Ferrero. Episcopus adjuvatus est a rev. dom. Carolus Gismondi, F.S.S.P., parochus s. Annae, a rev. patre Justino Ramos, O. Praem., qui functus est ut diaconus, et a rev. patre Victore Szczurek, O. Praem., qui functus est ut subdiaconus. Fratres et postulantes parvi Oratorii Didacopoli ministraverunt pro clericis, ducti a priore caerimonario Esselega Paver, cui opitulatus est alter caerimonarius Joannes Polhamus. Cantores Bach Collegii Didacopoli cecinerunt musicam scriptam ab Orlando Lasso et Joanne Polhamo.

Dominus Antonius Thomas Miles Sancti Sepulchri fuit et album mantelum cum cruce Hierosolymitana habebat.


Pater Justinus mitram simplicem inponit super caput Episcopi

Episcopus sedet in faldisterio (sella)

Episcopus elevat calicem pretiosissimi sanguinis Domini nostri Jesu Christi

Tuesday, October 21, 2008

Primae Vesperae in Festo Sanctorum Omnium


Pridie Kalendas Novembri (die 31 Octobri), hora XIX, Fratres Parvi Oratorii Didacopoli una cum membris Chori Breviarii canent Vesperas in ecclesia sanctae Annae cum benedictione SS. Sacramenti. Hebdomadarius erit reverendus dominus Carolus Gismondi, F.S.S.P., cui nuperrime paroeciae illae cura data est ab Episcopo nostro, reverendissimo domino nostro Roberto Brom. Post celebrationem sacrificii vespertini, litania sanctorum cantabitur, omnibus fidelibus procedentibus ex ecclesia candelas tenentibus in manibus. Cum Fratres in sanctuario cantum Gregorianum canturi sint, nonnulli periti cantores ex Bach Collegio Didacopolitano aderunt ad musicam polyphonicam afferendam. Re vera, in vigilia Sanctorum Omnium, quidam sunt qui daemones ex ignorantia colunt vel detestabiles mores exhibent. Ideo ex imo cordis invitamus vos omnes, o lectores, ad hanc caeremoniam per quam volumus reclamare Vesperas Sanctorum Omnium ad cultum Catholicum. Gratias agimus domino Carolo Gismondi qui ecclesiam suam nobis aperuit et praeerit ad celebrandum opus Dei.


Rev. dominus Carolus Gismondi, F.S.S.P.

Ecclesia Sanctae Annae
621 Sicard St.
San Diego, CA 92113

Tuesday, October 14, 2008

De Audienda Latinitate Christiana (Pars II)


Celeberrimus Rev. Pater Reginaldus Foster, qui vivit in Civitate Vaticana ubi in linguam Latinam vertit scripta amati Papae nostri Benedicti XVI, olim recitavit omnes sermones sancti Leonis Magni I Papae. In V saeculo post Christum natum, sanctus Leo Magnus sermones suos dicebat in festis Ecclesiae, verbi gratia in sancta Pascha, in die natali Domini, in Pentecoste, et in temporibus specialis, sicut in Quadragesima, in jejuniis Quattuor Temporum, etc. Magni momenti erat Papae Leoni debellare haereses quae minabantur fidei integritatem et unitatem Ecclesiae. Ariani negabant divinitatem Christi, monophysitae humanitatem Ejus, macedoniani blasphemabant in Spiritum Sanctum, et multi alii sequebantur falsas et detestabiles opiniones. Nihil sub sole novi! Sanctus Pater Leo Magnus non solum docebat fideles dogmata quae tenenda essent secundum veram fidem Catholicam, sed etiam hortabatur oves suas ut doctrinam confiterentur praesertim in bonis moribus, dando eleemosynas pro pauperibus, colendo virtutes et fugiendo vitia. O Latinitatis amatores, gratias agamus Rev. Domino Gario Coulter qui in situ interretiali suo collegit lectiones Patris Reginaldi pro omnibus cultoribus linguae Latinae! Ite istunc, et audite: Sancti Leonis Magni Tractatus. Pater Reginaldus optime legit sermones, adjuvans ictu vocis suae tirones ad comprehendendos textus. Cum tamen aliquae partes XCVI sermonum absint (nempe sermonis XXXIV, LIII, necnon LXXXI), ego, misellus lector, legi eas, et posui in Interrete ut omnes tractatus lecti sint pro omnibus hominibus linguam Latinam diligentibus.
Boomp3.com
Boomp3.com
Boomp3.com
Boomp3.com

Imago sancti Papae Leonis Magni a Carolo Urbino, in sacello Sancti Aquilini, in basilica Sancti Laurentii Majore, Mediolani.

Friday, October 10, 2008

Vita Beati P. Philippi Neri



Nuperrime inveni in bibliotecha electronica Google librum scriptum ab Antonio Gallonio de vita sancti patroni nostri Philippi Nerii: Vita Beati P. Philippi Neri Florentini. Nunc necesse est me legere Latine praeclara Apostoli Romanorum gesta. Re vera editio antiqua est et non facillime legitur, sed guadeo quia nondum inveneram in Interrete. Fortasse melius exemplar aliquando invenietur, sed sufficiat hodie quod habemus.

Monday, September 29, 2008

Nova et Vetera

Fratres Parvi Oratorii Didacopolitani parati sunt ministrare s. Missam et secundum novum et secundum veterem ordinem Missalis Romani. Per Cenaculum Familiae Sancti Hieronymi quod occurrit mense Augusti in urbe Mobile, AL, ministravi pro rev. patre Valentino Young, O.F.M.:

Pater Valentinus benedicit fidelibus in fine celebrationis s. Missae lectae secundum formam extraordinariam Missalis Romani.

Pater Valentinus recitat Latine preces post Missam lectam.
Reverendus dominus Coemgenus Zilverberg autem secundum novum ordinem celebravit Missam votivam de Sancta Cruce, eum adjuvante rev. dom. Thoma Krupich:

Dominus Coemgenus imponit tus in turibulum:

Sunday, September 21, 2008

De Audienda Latinitate Christiana (Pars I)


Magni momenti est praesertim Catholicis Christianis non solum legere et intelligere linguam Latinam sed etiam audire et loqui (vide constitutionem apostolicam "Veterum Sapientia"). In Interrete possibile est audire nonnullos sermones, preces, vel textus de re Catholica alta voce recitatos. In hac serie certiores volo vos facere, o lectores pauci sed dilectissimi, de sitibus illis. Libenter incipio a situ "Voce Alta" reverendi domini Coemgeni Zilverberg, qui est optimus sacerdos dioeceseos Siouxormensis. In situ suo, Pater Coemgenus alta voce recitat textus Novi Catechismi et meditationes de documentis Concilii Vaticani Secundi. Auditores suos invitat tamen ut petant nova lectiones de quolibet Catholico argumento. Quid cunctaris? I ad situm Patris Coemgeni et audi vocem ejus!

Wednesday, September 10, 2008

De admissione mea ad Parvum Oratorium Londinii


Die 7 Januarii (vel a.d. VII ID. JAN.) A.D. MMVII, Londinii, factus sum frater Parvi Oratorii per caeremoniam quam videre potes deorsum:

Illa die, cum fierent exercitia Oratorii, quae constant ex precibus, hymnis, et sermone ad fovendam caritatem, candidati introducti sunt in fraternitatem a reverendo Patre Ronaldo Creighton-Jobe, cui adsistebat frater Jacobus Cross. Gratias ago Federico, amico meo Italico qui venerat mecum Londinium et moventes laeti eventi imagines cepit.

Wednesday, September 3, 2008

Domina Ulmi

In vico Portu majori, quem habitabam priusquam venirem ad Civitates Foederatas, exstitit sacellum dicatum Beatae Mariae Virgini conditum anno MDCLX. Illo tempore erat magna fames in vico sed sacerdos Apollonius Boarius frequenter precabatur una cum puella quadam juxta gypseam imaginem Matris Dei fixam ulmo arbori. Plebs pia quoque sequebatur pastorem bonum et preces suas fundebat ut calamitas finiret per intercessionem Sanctae Mariae. Mira celeritate fami terminus fuit et laeti necnon grati Portuenses ecclesiolam ubi imago contineretur aedificaverunt. Arbor caesa est et in fragmenta divisa quae familiae Portus haberent.
Fratres Oratorii discerunt hymnum Portuensem cui titulum est Italice "Madonna dell'Olmo" (Domina Ulmi, Latine) ut canerent eum per peregrinationem septem ecclesiarum de qua scripsi. Tu quoque potes eos audire et videre et, fortasse, discere hymnum:

Monday, August 25, 2008

Peregrinatio Septem Ecclesiarum Didacopolitana

Sanctus pater noster Philippus Nerius traditionem instituit ambulandi per septem ecclesias Romanas in spiritu jucundae poenitentiae. Septem Romanae ecclesiae electae a patrono nostro sunt: S. Petrus in Vaticano, S. Paulus extra muros, S. Joannes in Laterano, S. Crux in Jerusalem, S. Laurentius extra muros, S. Sebastianus extra muros et S. Maria Major. Die 24 Augusti (more antiquo a.d. IX Kal. Sept.) fratres et postulantes Parvi Oratorii Didacopolitani secuti sunt vestigia majorum et peregrinati sunt per septem ecclesias in urbe Didacopole. Frater Rhodanus Lillard, F.S.S.P. et Domina Veronica Castro, gratissimi hospites, iter fecerunt et portaverunt nobiscum pondus diei et aestus. Fratres offerunt hoc parvum sacrificium in reparationem sacrilegii quod factum est in Sanctissimum Sacramentum in Oratorio Londinii ab Americano quodam. Quod magni doloris causa fuit apud patres, fratres et fideles omnes Oratorii Londinii. Fortasse tamen sacrilegus homo ille propinquior Deo est quam aestimet. Sicut scripsit Sanctus Augustinus in libro XII Confessionum (14. 17): Odi hostes ejus vehementer: o si occidas eos de gladio bis acuto et non sint hostes ejus! Sic enim amo eos occidi sibi, ut vivant tibi.
Prima statio, ubi incepimus iter, fuit ad Sanctam Crucem. Hora 10 et 15 minutis, Rev. Pater Joannes Caronan, Ord. Praet., post celebrationem Missae, nobis dedit paternam benedictionem suam.

Hic pertransimus necropolin Sanctae Crucis

Secunda statio: ad Sanctum Judam Thaddeum

Rev. Dominus Emmetus Farrel, pastor illae paroeciae, et totus grex ejus benignissime nos receperunt et mercedem suam non amiserunt.
Tertia statio: ad ecclesiam Christi Regis

Hic dederunt nobis calices aquae fridigae in nomine discipuli

Statio quarta: ad Sanctam Annam

Cum Missa celebraretur, potuimus loqui cum nullo homine sed sub umbra turris campanariae locum refrigerii invenimus.

Parvum jentaculum

Statio quinta: ad Sanctam Mariam Dominam Angelorum

Non invenimus populum, sed cecinimus hymnum Beatae Mariae Virgini

Sexta statio: ad Sanctam Mariam Dominam Rosarii, in parva Italia.
Advesperascebat et manuimus ut canerent preces vespertinas juxta ecclesiam.

Septima Statio: ad Sanctum Josephum (ecclesiam cathedralem didacopolitanam).

Fratres, fatigati at felices, gratias agunt Deo, Sanctae Mariae, et Sancto Josepho, ejus castissimo sponso.

Saturday, August 23, 2008

Ubi sunt haeretici?

Posted by Picasa

De Cenaculo Familiae Sancti Hieronymi

Hinc porro volo scribere Latine! Cum sermo meus non sit ciceronianus, tamen spero te, lector, intellecturum esse quod scripserim et non multas mendas adesse.
A die quinto usque ad undecimum hujus mensis eram in urbe Mobile, in Alabama, ubi fiebat Cenaculum Familiae Sancti Hieronymi. Habuimus jucundissimam hebdomadam per quam orare, loqui, ludere Latine potuimus. In prima photographia, vides coetum nostrum. Sunt juvenes et


senes, sacerdotes et laici, doctissimi cultores latinitatis et humiles tirones. De die in diem audiebamus acroaeses de theologia, de historia Ecclesiae, de sanctis, etc. Liturgia et recitatio sancti Rosarii magni momenti sunt in Cenaculo. Cum sim frater Oratorii, paratus sum ministrare et canere in ambobus ritibus. Prima mane ministrabam Missam privatam erga ritum antiquiorem quam celebrabat Pater Valentinus Young, O.F.M.:

In sacello tamen Missa celebrabatur in utroque ritu, secundum animum sacerdotis celebrantis.


Reverendus dominus Coemgenus Zilverberg diligit bene celebrare suam Missam secundum novum ordinem. Mihi placuit eum quoque adjuvare. Dominus Coemgenus nunc legit precem quamdam ex missale. Alter sacerdos est Rev. Dom. Thomas Krupich, qui celebravit cum eo novam Missam sed et dicit veterem ordinem.


Lego lectionem ex Vetere Testamento et psalmum responsoriale:


Si invenero alias photographias, certiores vos faciam. Si inveneritis mendas, quaeso scribete mihi. Valete!